admin
15-06-2019 - 04:13 am


قوانين الارتباط بالضباط
بنات كتير اوي بتفرح لما بترتبط أو تتجوز ظابط ،، طبعا انتي الحق تفرحي لأن الأمان اللي هتحسيه معاه خصوصا لو بيحبك مش هتلاقيه بنفس الدرجة مع شخص عادي , بس لازم كمان تعرفي حبيبتي زي مافي مميزات عن غيره ، في أيضا عيوب تختلف عن غيره , لو شايفة نفسك مش هتتحملي طباعه وطبيعة عمله يبقي الأفضل تنسحبي مايكملش لأنك هتتعبي اوي معاه

سلبيات وايجابيات الزواج من ضابط


تعالي لما اقولك ايه هي السلبيات اللي هتقابلك من الضابط وخصوصا لو ضابط جيش مع شرطة

أولا


علي قد ما يكون متفاهم معك عنده ثبات انفعالي ويساعدك في احلامك لحد ماتوصلي ، علي قد رجولته شادة عليه اوي في الغيرة ، يعني هتحققي أحلامك وانتي منطوية مع نفسك مفيش كلام ولا تعامل مع جنس راجل تاني ، لو خلفتي كلامه هتشوفي منه غضب وحش

ثانيا


قايمة الممنوعات ،، ( ممنوع تحطي صورك ، ممنوع تلبسي كذا ، ممنوع تأكلي كذا ، ممنوع تروحي المكان كذا ،، ممنوع تكلمي راجل أو تردي علي كلامه ،، الخ ) ، ولو فكرتي تعترضي هيقولك انتي معاكي راجل مش سوسن حضرتك

ثالثا


هيفتحلك تحقيق يومي ولازم يعرف خط سيرك في كل ثانية وكل لحظة زي مثلا ( خرجتي ليه من غير ماتقولي ؟ ، المفروض تكوني في البيت الساعة كذا حضرتك متأخرة ربع ساعة ليه ؟ ليه سهرانة وفاتحة الفيس مش المفروض تكوني نايمة في الوقت ده ؟ ) ، وطبعا مطالبة لو مش فاتح تبعتلي لة رسالة أو فويس تعرفيه خطواتك وهو لما يفتح يبقي يشوفها ، كل ده طبعا بحجة أنه قلقان عليكي 

رابعا


الخناقات بنكم يوميا ،، وده طبعا لأنه مقيد حريتك وهو كمان بعيد عنك فمشدد عليكي شويتين بالإضافة تأثير التوتر والضغط اللي بيكون فيه بطبيعة عمله ، عايزك تقولي حاضر ونعم بدون مجادلة غير كده هتلاقي انفعالات غير طبيعية علي اتفه الاسباب .

خامسا


حياتك كلها جادة ،، مفيش خروجات ولا في فسح زي ما اصدقائك بتعمل ، المفروض انه في وضع حساس وانتي تخصيه ، طيب انا طول السنة مراهقة عايزة اشم نفسي يومين ! ، لا طبعا مفيش الكلام ده هو انا عارف اسم نفسي لما انتي تشمي نفسك ، لما أنزل إجازة هعوضهالك ، تلاقي نفسك أمام تيمور التاني

سادسا


العقاب والحساب حاضر طول الوقت ،، حضرتك كل خطوة وكل كلمة بتقوليها في أي وقت لأي حد وخصوصا لو راجل محسوبة عليكي ، لأنه طبعا مشغل مخابراته لمراقبتك ومراقبة تصرفاتك ،، هتقولي له انت مش واثق فيا ؟ هيقولك بثق فيكي لكن مش بثق في اللي حواليكي وانا واجب عليا احميكي

سابعا


مفيش دلع ولا رومانسيات زي الباقين ،، هو يقولك كلام حلو يرفع من روحك وروحه المعنوية اكيد ، بس يكون بيكلمك وفي لحظة الخط اتقطع أو النت فصل اذا ماكانش فاصل علي خناقة ولها تكملة ياحياتي ، إنما فسح خروجات دي وسيشن صور زي الباقين دي اخرك تتفرجي علي مسلسلات تركي زى حالاتي كده 

ثامنا


هتعيشي في توتر طول حياتك ، لأنه في مكان كله حرب وشغله قايم علي الجرائم والقتل والحرب والرصاص ، يعني لما الخط قفل متعرفيش هو قفل ليه أساسا !! ، ياترى هو بخير والا حصله حاجة ؟ ، منتظرة تستمري في القلق لحد 10 أو 11 ساعة اذا ماكانش اكتر علي مايفتح ويطمنك انه لسه بخير وفيه الروح

تاسعا


عنده مهارة قوية انه يضايقك لو زعلان منك أو يخليكي تفشكلي زعلك منه لو ضايقك بجملة واحدة بس ( انا طالع مأمورية صعبة ويقفل ) وقتها انتي كل تركيزك انك خايفة عليه فتلاقي نفسك تجاهلتي أي زعل منه علشان تطمني عليه ، وترجع تقولي بعد ما اطمن هاخد موقف من ناحيته ، ترجعي تلاقيه عمل موقف تاني ضايقك وهكذا

عاشرا


حياتك علي كف عفريت ،، عايشة في حلم جميل معاه وخططوا ببكرة سوا ، وفي الحقيقة انتي خايفة تصحي في يوم علي خير ويتحول الحلم لكابوس , من الاخر كده هو ارتباط محسوب عليكي وادبستي وخلاص وعايزاه أقبليه بكل عيوبه قبل مميزاته ومبروك عليكي المقلب ياروحي ( قدرك بقي هنقول ايه ؟ ) مش قادرة تتحمل الصدمات يبقي انسحابي من الاول أفضل ليكي وله


صور

قوانينالارتباطضباط