admin
07-08-2019 - 02:28 am


حق الشعراء مهدور

تعالوا نتكلم سوا ع الاسباب واللى بيحصل على ارض الواقع


كثرة الشعراء


عدد الشعراء كبير جدا مقارنة والملحنين والموزعين والمطربين مما ادى لخلل فى النسبه بين الاطراف


المواهب الجديدة


المواهب الشابه فى الشعر فى بدايتها متلاقيش اى نوع من انواع من الدعم ملهمش مكان يتعلموا فيه الشعر والاوزان حتى


بداية الشعراء


مفيش شاعر يبدأ مكتمل الموهبه ممكن اكون لسه بادئ وعندى افكار حلوه وموهوب جدا , بس بعانى من مشكله فى الاوزان وبكسر الكلام واذا اعرض كلامي على شاعر وملحن يسخر منى او يقلى كلامك مكسور انت مش نافع , بدل ما يساعدنى اصلح غلطتى او يكمل الناقص عندى او يدلنى اعمل ايه , جابلى احباط من اولها ويكرهنى فى موهبتى ونفسى


الملحنين الكبار


الملحنين المشهورين صعب يدوه وقت كبير للشعر الجداد , صعب يصلحولهم كسور فبتبقى النتيجه عدم الرد على معظمهم وعدم فتح رسايلهم من الاساس دا بفرض ان الشاعر الجديد قدر يوصل لملحنين اصلا


الشعراء والملحنين


بفرض ان الكلام مش مكسور وانك كويس فعلا فى اعداد رهيبه غيرك مواهوب وموهوبه بتبعت برضه عامله ازعاج وضغط ع الملحنين فالبتالى بنسبه كبيره جدا كلامك الحلو هيتوه فى الزحمه ومش هيتقرى ولا يوصل


الملحنين الجداد


الملحن الجديد بيفضل يلاقى فرصه عشان يشتغل مع شاعر معروف عشان ياخد بايده لو ملقاش بيشتغل مع شاعر جديد زيه والاتنين بيلاقوا صعوبه شديده فى الوصول للسوبر ستار ولو حصل وباعوا اغانى بيبيعوها بسعر التراب وممكن ببلاش


ضغط الشعراء علي الملحنين


الزن من نوع معين من الشعراء الزن الزياده عن حده , واستخدام اساليب مش محترمه فى الكلام والتعامل مع اللى مبيردش عليها قفل الباب فى وش ناس محترمه وكويسه كتير وخلى الملحنين يفضلون عدم التعامل مع الجداد خالص الا فى حالات نادره


نجوم الفن


السوبر ستار بطبيعة الحال يفضلون الاسامى الكبيره المحترمه اللى جوه دايرتهم ولو حصل ان واحد من الجداد قدر يفك الحصار ده بيبقى بطل. مع ان فى اسامى كبيره بدأت تكرر نفسها ومفيش جديد بس هى دى طبيعة الامور خصوصا ان المطرب دلوقتى مبقاش بيختار كلمات هو بياخد حاجه جاهزه على بعضها زى القالب كده


الأعلام


نيجى نشوف الجانب الاعلامى نلاقى ان فى تعتيم وتجاهل بيحصل للشاعر فى الغالب والضوء كله منحصر ع النجم وحتى الملحنين والموزعين بيعانوا من عدم كتابة اساميهم ممكن يمشون في الشارع محدش يعرفهم


الشاعر مظلوم


نيجى نشوف جانب التعامل المادى نلاقى ان الضغط كله بيحصل ع الشاعر وكأنه الحلقه الاضعف فى السلسله , مع انه البطل الحقيقى للغنوه وياما شفنا تنازلات من الشعراء فى الفلوس عشان مجرد اسمهم ينزل


شعراء مدفونين


فى شعرا موهوبه جدا جدا فى الاقاليم والمحافظات بس المساكين ملهمش فى السوشيال ميديا ولا ليهم متابعين في تم تهميشهم وقتل موهبته بدرى بدرى


الشعراء الموهوبين


اللى بتكتب عاميه وفصحى ومفروض يتعرفوا ويبقى ليهم متابعين ويطبع لهم دوواين ويتعملهم ندوات وحفلات ويظهروا فى حلقات وبرامج معظمهم ضاع فى الرجلين واكتفى بروفايله الشخصى في ناس تجتهد منكرش ف حدود امكانيتها


المهرجانات


موجة الابتذال دمرت شعري كتير بتكتب كلام راقى وضغط السوق اللى حاليا ما شاء الله كله طالب كلام مطرقع وكلام مشهيص وكلام فارغ خلى الشاعر الموهوب تايه فى النص اكتب كلام راقى ولا امشى مع تيار الابتذال اللى حاصل ده ؟


المطربين


بدل ما يعملوا مواقع ليهم ثابته ع النت يترسل ليهم عليها كلمات , او بدل ما يعملوا مسابقه سنويه لاختيار شعراء جدد فى البوماتهم , اكتفوا بالمقربين , وكانت النتيجه البومات مكرره مستهلكه واقعية وتم احباط باقى المبدعين وخصوصا الشاعر


حقوق الشعراء


عدم وجود اى كيان وجهه تضم الشاعر وتحميه , الشاعر ملطشه ملوش حقوق وله اهميه , حتى لو كلامه اتسرق امك فى العش ولا طارت وابقى قابلنى


مشكلة الانتاج


الازمه الاقتصاديه والانتاج شبه المعدوم والخوف من المنتجين من اى مغامره جريئه للاستفاده من المبدعين الشباب ادى الى تحول الفن لتجاره وللاسف الشاعر مش داخل فيها كمان


الصمت


 سكوت ناس كبيره ومشهوره كتير والاكتفاء بدور المتفرج من اللى بيحصل قضى على اى حلم بالتغيير فيما عدا محاولات فرديه نادره , من هنا بقول stop لازم وقفه , كفايه كده جه وقت التغيير خلاص , اعمل شير وشارك برأيك لانقاذ الشاعر البطل الحقيقى لأى عمل




صور

شعرشعراء